الحب... بلا مقابل

يتساءلون لماذا أفديها بدمي

عندما يفديك أحد بدمه هل تتنكر لهذا الدم  ؟؟؟

كنت في مستشفي أقوم بعمل عملية دقيقة

 ودخلت فتاة لطيفة جميلة مرحة     

في المنتصف الثاني من العشرينات وكنت أنا في تمام العشرين عام  

سنوات قليلة تكبرني بها لكني شعرت منها

بحنان الأم التي فقدتها منذ طفولتي المبكرة 

اقتربت من سريري في وسط ترحيب من الجميع

الأطباء, الممرضات ,المرضي

تحول جمود الغرفة لحياة

 نبضت من شرايينها المشعة وحركاتها المليانة بالطفولة  الشقية

قلت : بصوت خافت  من هذه ؟؟؟

قالوا لي دي كذا وبتعمل كذا وكذا

نسيت تعبي وعمليتي الجراحية التي ستجري لي بعد عدة أيام

وقعدت علي السرير ساكنة

 أتفرج علي الملاك الجميل بروحة الحلوة اللي لفت المكان

لحد ماجت عندي وسألتني ؟؟؟

أنتي يا قمر اسمك إيه ؟؟؟

جاوبت بصوت هامس مع أن صوتي عالي قوي

 بصت لي بابتسامة حلوة وقالت لي بكرة تبقي زى الفل

ما تخافيش بس أهم حاجة بطلي دلع .

كان في شوية حاجات ناقصة في المستشفي

وكانت عمليات كثيرة متأخرة عشان النواقص دي

كله فجأة بقي موجود حتى الدم الناقص

جابت شباب كتير جت أتبرعت بيه

 وكل العمليات تقريبا اتعملت

قبل ما أخرج من المستشفي لقيتها جت

جريت عليها اسلم

بصيت لي قالت : آدا دا أنتي بقيتي تمام ؟؟؟

قلتلها نحمد ربنا ونشكر فضله

سلمت علي كل الناس ومشيت

جت لي الممرضة قالت لي :

أنتي بالذات كنتي لازم تشكريها اكتر من كده

سألت ليه ؟؟؟

قالت لأن دمها هو الوحيد اللي أتناسب مع دمك

وهي اللي أتبرعت ليكي عشان تعملي العملية

أخدت عنوان مؤسستها وسافرت ليها

زى ما هي مرتين سافرت لي

أول ما دخلت لقيت لوحة كبيرة مكتوب عليها

( أحنا كلنا شعب واحد بنعبد رب واحد

في منا بيعبده في الجامع وفي منا بيعبده في الكنيسة

لكن كلنا أخوات بعضنا بنحب شعبنا ومصرنا ... )

انبهرت بكل اللي شفته 

والخدمات الكتيرة اللي بيعملوها

وفرح الناس اللي كانت جاية حزينة 

وخرجت كلها فرح وأمل

 وطلبت منها أتطوع معاهم في الخير الجميل اللي بيعملوه مع الجميع ووافقت ورحبت بي

علمتني أن كلنا زي بعضنا ما في حد أحسن من غيرة

غير بالخير اللي في قلبه وطهارة عمله

كمان علمتني أن ما في حد موظف عند حد

كلنا لينا عمل بنعمله عشان الخير الكبير يتحقق .

ومن اليوم دا لما حد يسألني أنتي بتحببها قوي كده ليه

انتم عارفين طبعا برد أقول أية ...

اللي أتعلمته منها :

أحنا واحد بنحب ربنا

ونحب بعضنا

في واحده مننا بتعبد ربنا في الجامع

 والثانية تعبد ربنا في الكنيسة

 لكن إحنا أختين

بنحب شعبنا ومصرنا